Ég er jafnaðarmaður. Af því leiðir beint að ég er femínisti sem vill að konur hafi sömu tækifæri og karlar og að ég er umhverfisverndarsinni af því mér finnst seinni kynslóðir eiga jafnan rétt á umhverfisgæðum og við sem núna lifum. Ég legg líka alla áherslu á menntamál sem besta tækið til að gefa fólki jöfn tækifæri. Í mínum stjórnmálaafskiptum á fyrri árum hef ég að auki lagt mikla áherslu á lýðræðis-, mannréttinda- og alþjóðamál. Það sem fékk mig til liðs við Samfylkinguna á sínum tíma, fyrir utan að mér fannst hún sá flokkur sem ætti besta möguleika á að láta félagshyggjuna verða að veruleika á Íslandi, var áhersla flokksins á lýðræðismál. Þetta er kjarninn í mér sem stjórnmálamanni.

Í kjölfar hrunsins í íslensku efnahagslífi finnst mér nauðsynlegt að ég komi inn í þingflokk Samfylkingarinnar með þann hóp ungs fólks í huga, sem vill mest af öllu fá að flýja land eða sér ekki annan kost í stöðunni. Þess vegna hef ég sérstaklega teiknað hér upp mikilvægustu málin sem snerta þetta unga fólk: Menntamál, húsnæðismál og atvinnumál. Einnig finnst mér virk þátttaka í alþjóðasamfélaginu grundvallaratriði í því að búa hér áfram. Og stærsta hagsmunamálið er Evrópusambandsaðild.

Lykillinn að því að ungt fólk búi áfram á Íslandi og taki þátt í að byggja upp er að við annars vegar getum búið hér. Hins vegar að við viljum búa hér. Ég vil fús búa á Íslandi og fara í gegnum erfiðleikana framundan ef það þýðir að við byggjum upp samfélag sem er sanngjarnara og jafnara og þar af leiðandi sterkara. Fyrir því vil ég beita mér á þingi.

Húsnæðismál | Menntamál | Atvinnumál
Fjölskyldumál | ESB | Alþjóðamál og fjölmenning